Zaj Dab Neeg Txoj Kev Hlub Tu Siab Pt.2

Los txog rau hnub 4 lub hli 7 xyoo 2010 uas yog lub hli ntiaj teb, tug hluas nkauj thiaj hais rau tug hluag nraug hais tias; me leej nus a ! nej nyob es sib sib hlub nawb mog. Tug hluas nraug thiaj hais rau tug hluas nkauj hais tias: "Me leej muam a ! ua cas koj hais tej lus zoo li ntawd ma es koj ho yuav mus dab tsi tiag ma ?" Tug hluas nkauj thiaj hais rau tug hluas nraug hais tias: "Tsis muaj dab tsi thiab tab sis tsam tej thaum koj tuaj kuv ho tsis nyob tsev lawm xwb os." Tug hluas nraug thiaj hais rau tug hluas nkauj hais tias: me leej muam a ! koj tsis txhob ua tej yam ua rau kuv tsis txaus siab nawb, kaj ntug tag kis kuv mam li tuaj saib koj os. Tug hluas nkauj thiaj hais rau tug hluas nraug hais tias: Me leej nus yog tag kis koj mam tuaj ces nws lig rau koj heev lawm os. Los lus kawg ntawm tug hluas nkauj hais rau tug hluas nraug nyob hauv xov tooj hais tias: “Mam nyob koj mos me leej nus, nco ntsoov hais tias kuv hlub thiab nco koj no nawb, tiam no tsis tau koj los tseg mam tos koj rau lwm tiam os, tu siab tshaj tsis paub yuav hais li cas rau koj”. Hmo ntawv tug hluas nraug thiaj li muab nuag qes txoj me kev deb tuaj mus cuag tug hluas nkauj tab sis tu siab ntau tuaj txog tug hluas nkauj twb hais tsis tau ib lo lus li lawm, vim tshuav txoj sia tsis tau tu lawm xwb, tug hluas nraug thiaj li tuaj saib ib hmo, hnub tom qab ntawd yog hnub tim 5 lub hli 7 xyoo 2010. Tug hluas nkauj thiaj li tau tso tug hluas nraug nyob ib leeg thiab tso tag nrho txoj kev nyuab siab, kev nco rau tug hluas nraug ib leeg ris.

[post_ads]

Tsab ntawv kawg ntawm tug hluas nkauj sau tseg cia rau tug hluas nraug hais tias: “Nyob zoo os tug neeg kuv nco zaum no kuv yuav ncaim koj mus lawm tiag tiag tsis paub hais li cas rau koj, kom koj zoo siab kuv tsuas muaj lus foom koob rau koj ua nus nyob tshav ntuj nrig mus tag ib sim neej xwb mog. Tij laug a! txij no mus ces kuv thov kom koj mus nrhiav tau tug hlub hlub koj thiab koj hlub hlub nws mus tag ib txhig nawb. Zoo siab ntau tiam no kuv tau ntsib koj, tab sis nws tsuas yog ib vuag zoo li npau suav xwb, ntshe twb yuav rov qab tau ncaim koj mus lawm thiab os. Nyob es rau rau siab kawm ntawv nawb, kuv vam thiab cia siab hais tias tej thaum koj ua nus yuav ua tau raws li koj lub siab xav thiab koj lub siab nyiam. Mam nyob koj nawb. Kuv xav hais tias cia kuv nyob tos koj seb koj puas tuaj kuv ntsib koj ib zaug tso no tiam sis kuv tos tsis tau txog hnub koj tuaj lawm, yog hais tias thaum twg koj txais tau kuv tsab ntawv lawm no nco ntsoov hais tias kuv tseem hlub thiab nco koj no os. Txawm kuv ncaim mus lawm los tshuav ib nplooj siab tsis qhuav ntshav tseem nco nco txog ib tug tib neeg nyob rau tom qab. Tu siab tshaj plaws tsis pom qab hais qhia ib lo rau leej twg li. Tiam neej no yog ua lub neej nyob lwj siab tag npaum li no tshe kuv yuav nyob tsis tau mus ntxiv, nyob ces ho nco txog tug neeg uas tau ncaim koj mus lawm thiab nawb. Thaum kawg ntawm kuv tsab ntawv no tsis paub yuav hais ib lo li cas ntxiv. Kuv cia siab ntsoov hais tias koj yuav xaiv tau ib tug nyab hlub hlub niam thiab txiv nkawd ib yam li koj hlub os”.

Ntuj yuas ib tsoom me nkauj muam thiab nraug nus peb tshwm sim los ua ib zaug neeg nyob rau hauv lub ntiaj teb no ua cas yuav muaj txhua tsav txhua yam tshwm sim nyob rau hauv lub neej ua rau yus muaj kev nyuab siab thiab chim siab, txawm yus tshuav ib txoj me kev hlub nyob rau tiam no. Txawm yuav hlub yuav nco npaum li cas los twb tos tsis tau, vim nyiaj ntxeem tsis tau txoj me kev chim siab, tu siab uas niam txiv coj tsis thooj luag zej luag zos tawm rooj plaws los ntshai luag hais ua neej nyob los lwj siab xav tuag los tseem tshuav txoj me kev hlub, txog thaum kawg kuj txiav txim muab kev hlub tso cia rau tom qab, muab yus txoj sia thiab lub me cev ntaj xib ntsug mus nrog av luaj dag nyob vim yus yog ib leeg khaub ntxhais raug leej niam leej txi hais lo lus tsis zoo rau yus, twb yeeb vim yog yus tsis thooj luag zej luag zos thiab tsis zoo li luag zej tsoom. Nyob los luag tsis nyiam mus los luag tsis ceem, thiaj li txiav txim siab muab yus txoj kev hlub nyob rau tiam no tso nphuav cia rau tom qab, es muab yus lub me cev ntaj xib ntsug thiab lub neej txoj sia, ua ib siab ncaim lub ntiaj teb mus nrog av luaj quas nyob, kom thiaj li ploj txoj niag kev lwj siab nyob rau tiam no os.Zaum no ces yuav ploj pliag tsis muaj hnub yuav rov qab tau sib ntsib lawm os, ib tsoom me nkauj muam nraug nus a !.

Zaj dab neeg los xaus li no lawm xwb os . ! .