Zaj Dab Neeg Hlub Tsis Tau Txaus Pt.1

Kuv nyiam nws. Kuv nyiam nws thaum nws luag, thaum nws co taub hau tsis paub tseeb hais tias yuav ntseeg los sis tsis ntseeg, thaum nws hnya, thaum nws taug tej txoj kev tav zas nyob tej npoo roob uas ntuj niam los nag ntub ntsuav es nws tseem muaj siab piav dab neeg kawg. Kuv nco thaum nws khi nws cov plaub hau dub nciab, ntxuav nws lub ntsej muag kheej lia, so nws ob lub qhov muag hlav li nplooj npleg, los sis tom nws ob daim nti ncauj kom liab tshiab tuaj, es thiaj ua rau nws zoo li tsis nkees pes tsawg vim hais tias nws tau nrog cov niam txiv tham lig lig los sis mloog dab neeg ib hmos.

Kuv tau ntsib nws thaum kuv muaj 19 xyoos. Nws tsis tau qhia kuv nws hnoob nyoog. Tab sis, kuv yeej paub hais tias nws laus tshaj kuv. Kuv tau ua nws luag, nrog nws mus ncig xyuas neeg tau 3 lim piam ua ntej nws rov qab mus Veescas sawv kev mus asmeslivkas teb. 11 xyoos tag los no, kuv cia li muab kuv lub neej ua txoj kev tshua tos nws seb nws puas rov qab los. Kuv nco nws txhua hnub txhua hmo. Ntuj nag tu lawm, ntuj no sawv tuaj, yeej tsis hnov nws xa xov tshwm. Ib xyoos dhau ib xyoos, txoj niag kev hlub tsuas loj hlob zuj zus tuaj, tsis paub ploj ib hmo los ib tav su kiag. Txawm wb tau sib ntsib zoo li ib ntsais muag xwb los, nyob hauv kuv nruab siab, kuv tsuas hlub nws ib leeg mus tas ib txhis. 

Txoj kev hlub no zoo li ib tug mob, pw lawm ces ntshe xeev tsis tau rov qab los. Kuv niam yug kuv yeej paub yeej pom kuv nplooj siab nco nws. Nws nquag tso dag pab kuv: - "Me tub es, ntshe thaum ub, nyob koj lub neej yav nram ntej, koj tau qiv nws nyiaj vob? Tos tam si no, koj yuav nco nws heev los ua kev them nws nuj nqi rov qab kom tiav." Nws cov lus ua rau kuv niaj hnub luag luag. 

Tsis yog them nuj nqi. Yog kev hlub tiag tiag. Kuv hlub nws vim hais tias nws yog kuv tus tav. Muaj tej hnub, kuv yeej kho siab kawg; kuv tsis paub hais tias yuav ua li cas thiaj mus cuag tau nws nyob sab ntuj nraum ub. Kuv yog ib tug tub pluag, ntshe yeej mus tsis cuag ib tug poj niam kawm ntawv siab, paub tab li nws.

Kuv yeej tsis paub dab tsi ntau dab tsi tseeb txog nws kiag. Nws tuaj li ntwg cua, peb lim piam tom qab xwb, twb ploj saum lub ntuj xiav lus lawm. Xyoo ntawd, yog xyoo uas kuv rov Nyablab teb los xyuas kuv niam thiab kuv txiv lawv. Kuv mus nyob tau Nyablab teb 4 lub xyoos diam. Kuv tsuas pom luag lwm haiv neeg muaj poj niam ntse xwb. Xyoo ntawd, kuv thiaj ntsib ib tug poj niam hmoob txawj ntse, ua rau kuv raug nyiam nws heev. Nws yog kuv thawj tug hlub.

Nws yog ib tug neeg xyuam xim ncauj xyuam xim siab, tsis tham txog nws tus kheej ntau, ua rau yus haj yam xav paub nws heev. Thaum nws nrog cov niam txiv tham, nws yeej txawj tso dag tso luag ua rau txhua leej txhua tus nyiam nws tag. Kuv ntsia nws mas zoo li nws ntxim hlub heev nrog nws ob lub hnab uas nws niam ev rawv, nws cov koob yees duab, nws poos txiv laum huab xeeb thiab nws lub me cev yiag ntxhias, lub tswv yim cus plaws, tsis hnyab tshaj 50 kislaus. 

[post_ads]

Nws niam tuaj mob siab zias tham tsheej hnub tsheej hmo nrog peb cov niam txiv kwv tij neej tsa. Kuv nrog nraim nws, coj nws kev mus rau txhua lub zos. Nws qhia tau hais tias nws tab tom tshawb nrhiav rau nws daim ntawv yuav xeem mus ua ib tug kws tshawb fawb txog neeg txuj ci. 

Lub sij hawm ntawd, kuv los kuv yeej hluas heev, tsis paub tab dab tsi txaus. Kuv ces tsuas nyiag nyiam nws vim hais tias kuv tsis tau pom ib tug poj niam hmoob muaj peev xwm npaum li nws uas tseem tuaj ib leeg tim tej lub zos nyob npoo roob npoo hav, rov tuaj kawm nws poj nws yawm tej txuj ci. 

Kev nyiam neeg ces zoo li ib nplooj siab dai vias, pw los dab ntub tsis tuaj, noj los tsis txaus yees. Ntshe yuav zoo li no mus xwb. Yeej tsis paub yuav ua li cas yuav mus nrhiav tau nws. Xov tooj los tsis muaj, chaw nyob los tsis tau. 

Kuv tsis kam yuav poj niam tseg; kuv niam kuv txiv lawv yeej txhawb kawg kom yuav ua ntej rov mus kawm kho mob nyob Nyablaj teb. Kuv yeej paub hais tias yuav nrhiav nws nyuab. Lub siab ces zoo li lub ntuj, tej hnub ces dub lus kho kho siab, tej hnub ho tshav tuaj muaj kev vam zog; tab sis 11 xyoos dhau los no, kuv nplooj siab nco yeej dai vias nyob ntawd.

Lub 11 hlis ntuj xyoo 2002, ua li cas kuv cia li thov tau nyiaj mus kawm kho mob ntxiv nyob rau Kasnasda. Kuv txiav txim siab xub mus tsaws nyob Asmeslivkas teb ua ntej. Xyoo no, kuv muaj 30 xyoo, tseem tsis tau muaj poj muaj sev. 

Lub dav hlau ya tsaws ntua Fevxawsnaus. Kuv me nplooj siab nplooj ntsws yaj cuag li cua. Kuv vam hais tias kuv yuav mus nrhiav tau nws xwb. Kuv yeej xav tuaj Asmeslivkas teb ntev ntev lawm. Txawm lub teb chaws no loj heev, kev nrhiav nws yuav nyuab npaum li cas los kuv cia siab ntsoov hais tias lub ntuj yuav pab wb rov sib ntsib sib pom. Kuv tuaj cuag kiag Hmoob lub peb caug. Zoo siab heev, yuav tau mus ntsib nws.

Cov kwv tij neej tsa sawv daws coj siab zoo heev, niam txais tos kuv siab dawb paug. Lawv niam hu kuv plig, khi kuv tes, coj kuv mus noj mov tom tej lab thiab ua si thoob plaws lub zos no. Tej zaum lawv yeej ceeb me ntsis hais tias ua cas tseem muaj ib tug hmoob kawm tau dauvtawj kho mob nyob Nplog teb thiab. Kuv los kuv cia li nrog lawv zoo siab hais tias ua cas lawv yuav zoo siab ua luaj ntsib kuv vim hais tias peb hmoob ntshaw kev kawm ntawv siab thiab muaj suab muaj npe heev. 

Thaum kuv nyuam qhuav tuaj txog, kuv tseem tsis muaj cuab kav nug cov npawg seb lawv puas paub kuv tus hlub tus tshua. Kuv xav mas lawv yuav tsum paub nws xwb vim hais tias poj niam hmoob kawm ntawv siab tsis muaj coob leej. Tab tsis, tsis zoo lam nug lawv ib tsam lawv ho xav li cas.